يا حلو الكلام
مش ناسية لما شوفتك ف المنام
بتلم ورقك وعينك مليانه كلام
ما نتطقتش لا بحرف ولا ملام
يا حلو الكلام
كنت لازم أفهم إنه كان آخر سلام
لما الضيوف قالولك خدت العمادة
زي ابوك وخدوك يا بدر التمام
يا حلو الكلام
عيوني اتخلقت عشان تشوفك
كل لحظة في اليقظة والمنام
وقلبي اتخلق لحبك حتى في الأحلام
يا حلو الكلام
كنت لروحي الطبيب تشفيها من الآلام
نورت روحي وصونتها من طيور الظلام
مش مصدقة فراقك حقيقة وللا أوهام
يا حلو الكلام
براجع واعيد كلامك قبل ما انام
كلمة كلمة وكل القوافي يا حلو الكلام
يا أجمل قصة عشق والأولى في الغرام
يا حلو الكلام
إسمك شوقك حنانك لحن وأنغام
ما جفت دموعي من يوم فراقك
ولا العيون بتنام يا حلو الكلام
نهى عراقي
Share this content:
