المذيعة غادة الطويل : رسالة حب إلي والدي في ذكراه

المذيعة غادة الطويل : رسالة حب إلي والدي في ذكراه

بقلم : المذيعة غادة  الطويل  

طول عمري كنت خايفه من اليوم اللي ابويا حيموت فيه…و طول الوقت كنت بادعي ربنا اني اموت قبله….بس ربنا كان له تقدير اخر.

من ١٨ سنه….زي النهارده سنة ٢٠٠٦
ودعت ابويا حبيبي اللي روحه ذهبت الى السماء.

عندي كام حاجه عايزه اقولها…

اللي ابوه او امه عايشين…يقضي معاهم اكبر وقت
يراضيهم….يدلعهم…يضحك معاهم….يسمع منهم القصص اللي سمعها عشرين مرة قبل كده…يأكلهم الاكل اللي بيحبوه…يتفرج معاهم على الافلام القديمه اللي بيستمتعوا بيها….ياخدهم يفسحهم في الاماكن اللي بيحبوها….و اهم من كل ده يشبع هو و اولاده (لو كان عنده اولاد)…. من حضنهم و حبهم و حنانهم و دعائهم.
ليه؟
علشان لما بيمشوا من الدنيا….الحياه كلها بتختلف…دايما الفرحه ناقصها حاجه…الصورة مش كامله لانهم مش موجودين فيها…
الحاجات المهمه…مبقتش مهمه قوي علشان هم مش موجودين…
النجاح….مبقاش بيفرح قوي زي زمان لان فرحتنا كانت بتبقه من فرحتهم بينا.

عايزه اقوللك يا پاپي
اني لسه على العهود اللي بيننا باقيه…
الحاجات اللي كنت عايزني اعملها باعملها…و بنفس طريقتك
و للعجب !!! الحاجات اللي كنت باستغرب انك بتعملها او بتقولها….بقيت انا نفسي باعملها و باقولها زيك…انا بقيت نسخه منك…و لي الفخر طبعا

مش حتصدق كم النصايح اللي بافتكر انك قولتهالي….و باعمل بيها….و باعلمها لكل اللي حواليا….اقول لهم ابويا علمني كده.

انت عايش و مستمر جوايا يا پاپي….و عمري ما حسيت انك مش موجود….
انا بس واحشني حضنك…ريحتك….
صوتك….وجودك في الحياه

عموما…
اتطمن…و انبسط في الجنه ان شاء الله…و سلم لي على ماما و نينه و عماتي و كل قرايبنا و حبايبنا اللي معاك…
و الى ان القاك….لك مني كل الحب و العرفان بالجميل و الفخر بيك في كل مكان تيجي سيرتك فيه…و لك مني الدعاء صباحا و مساءا…
١٨ سنه مفيش يوم مدعيتلكش فيه …
مفيش يوم مجتش على بالي و ابتسمت …مفيش يوم عدى من غير ما اشوف صورتك …

انا و اخواتي الحمد لله كويسين…حققنا حلمك و رغبتك اننا نبقه متماسكين و قلبنا على بعض….و التزمنا بالتعليمات و الاخلاق اللي علمتهالنا…
و احفادك كمان الحمد لله كويسين….و زمانك شايفهم من السما و فرحان و فخور بيهم جدا.

الى ان القاك يا أغلى الغاليين لك مني كل الحب و الدعاء.. و من فضلك تعالالي في الاحلام اكتر شوية …احلى يوم هو اللي باصحى من النوم و انا سعيدة انك كنت معايا في الحلم.

لروحك الف سلام و رحمه